Russia President atan hneh takin Putin thlang tling leh

Russia inthlanpui neih zawh takah, rin lawk ang ngeiin an ram president ṭanglai, Vladimir Putin chu President atan hneh taka thlan tlin leh a ni.

Pathianni khan inthlan hi zawhfel a ni a, Putin hian vote tla aṭangin 87.8% zet a hmu a, Soviet Union keh darh hnua Russia rama inthlan neiha vote tla aṭanga hmu hnem ber record a siam zui a ni. Communist candidate Nikolai Kharitonov chu pahnihna niin 4% chauh a hmu pha a, newcomer Vladislav Davankov chu pathumna a ni a, palina chu ultra-nationalist Leonid Slutksy a ni.

Russia ram pum, time zone 11 hnuaiah vote hi ni thum chhungin thlak a ni a, Urkaine ram a luah mekah pawh vote hi online hmangin thlaktir an ni bawk. Pathianni zan khan vote thlak hun hi a tawp a ni. Vote tla hi 74.22% niin kum 2018-a vote tla 67.5% a rawn khum a ni. Inthlan hi venhimna khauh tak hnuaiah neih ni mah se, hmun ṭhenkhatah chuan polling station suasam te a awm a, Moscow leh St Petersburg-ah polling station beih leh hal tuma puh mi eng emaw zat man an ni bawk. Pathianni bik khan khawpui 20-ah mi 80 man an ni.

Russia President atana thlan tlin a nih leh tak avangin, kum 71 mi Putin hian kum ruk term a hmang leh dawn a ni. Tun term thar hi a hmang tluan thei a nih chuan, kum 200 chuang chhunga Russia ram hruaitu ni rei thei ber Josef Stalin record ding lai chu a khum thei tawh dawn a ni.

Hnehna a chan hnua Moscow-a thu a sawiah, Putin chuan Russia-in Ukraine-a special military operation a neih mek kaihhnawih hrang hrangte chu a ngaih pawimawh hmasak tur thu sawiin, Russia sipaite chu thuam chak an ni dawn tih a sawi. "Thil tam tak hmachhawn ngai kan nei. Mahse kan ṭanrual phawt chuan, tu pawhin min nuai bo leh rahbeh tum ṭhin mah se, an la hlawhtling ngai lo a, tunah pawh an hlawhtling dawn lo," tiin a sawi. An ram inthlan chu democracy kalphung ang taka neih a nih thu pawh a lo sawi tawh bawk.

Russia inthlan result puan a nih hnuah US, Germany, UK leh khawthlang ram dangte chuan eptu hruaitu ṭhenkhatte man an nih avangin inthlan hi a felfai tawk lo nia an ngaih thu an sawi. China erawh chuan Vladimir Putin a lawmpui thu sawiin, ram pahnihte inlaichinna pawh a nghet chho zel dawn tih a sawi. Ukraine a rûn avanga khawthlang ramte'n Russia an hrek mek karah, China nen erawh an inlaichinna an siam ṭha zel a, kum 2022 February thla khan Putin-a'n Beijing a tlawh ṭumin China leh Russia hian 'no limit' partnership an lo puang tawh a ni. Kuminah pawh China President Xi Jinping leh Putin te hian meeting vawi eng emaw zat neih an tum nia sawi a ni.