Tlang kang avangin Iceland-in state of emergency puang

Iceland-a Reykjanes peninsula-ah Inrinni khan tlang kang inphuh chhuak thar lam a awm avangin nimin khan state of emergency puan a ni.

Icelandic Meteorological Office (IMO) chuan thuchhuah siamin, Reykjanes Peninsula-a Stori-Skogfell tlang leh Hagafell tlang inkarah, lava lo luang chhuak nasa tak a awm thu hi an tarlang. Hetianga tlang kang inṭham anga lava luang chhuak a awm avang hian thuneitute chuan state of emergency puan a nih thu leh, lava lo chhuahna hmun dik tak zir chiang tura chet an lak nghal thu an sawi. IMO hian tuna lava lo chhuahna hmun hi February 8-a lava lo chhuahna bul hnai mai niin an sawi a, hei hi Grindavik khaw venna atana dykes an siam lamah a luang niin an sawi bawk. Hei hi thla thum chhunga tlang kang lava luang chhuak ṭum li a thlenna a ni tawh a ni.

Lava luanna lama awm khua, Grindavik aṭang hian December 18 khan mihring thiar chhuah an ni tawh a, January 14 khan lava luang hian khaw chhung lutin, invenna an siamte'n eng emaw chen lo dang mah se, in ṭhenkhat chu a chhe tho a ni. February 8 khan lava hi lo luang chhuak lehin, hei hian khaw chhunga tui lak luhna pipe leh tui lum inpeknate a tihchhia a ni. State of emergency puan a nih hnu hian Iceland-a khualzinte hmun tlawh nasat ber, Blue Lagoon thermal spa aṭangin mi 100 chuang lak chhuah an ni tawh a, mihring thi leh hliam an awm erawh hriat a la ni lo.