Afghanistan-a Taliban bihrukna Pakistan-in a bei

Pakistan sipaite chuan Afghanistan-a Pakistani Taliban-te inkhuarna hmun nia an hriat chu thlawhtheihna hmangin an bei.

Pakistani Taliban-te hian kar liam ta Inrinni khan thih chilh bomb hmangin Pakistan hmarthlang lam an bei a, sipai pasarihin nunna an chan a ni. Hemi chhan let nan hian Pakistan sipaite'n airstrike hi an nei nia ngaih a ni. Pakistan president Asif Ali Zardari chuan sipai thi tate thisen chu a thlawna a luan dawn loh thu sunna hun an hmanah a lo sawi tawh a ni.

Afghan Taliban thupuangtu, Zabihullah Mujahid, chuan Pakistan-in van lam aṭanga an beih avang hian Paktika province huam chhungah nutling pathum leh naupang pathumin nunna an chân bakah Khost province-ah nutling pahnihin nunna an chân tih a tarlang.

Airstrike an neihna hmun hi Khost leh Paktika province a nih thu Pakistan sipaite chuan an sawi a, heng hmunte hi Pakistani Taliban-te tawm khawmna hmun nia an hriat a ni. Airstrike an neih avang hian Pakistan sorkar leh Taliban kaihhruai Afghanistan sorkar inkar chu a ṭhat loh phah rin a ni bawk.