Donald Trump-a'n hospital chhuahsan White House-ah inenkawl chhunzawm dawn

US president Donald Trump chuan Covid-19 a kai vanga sipai damdawi-in, Walter Reed military hospital-ah ni li leh zan thum enkawl a nih hnuin Thawhṭanni khan damdawi-in aṭangin a chhuak a, White House-ah a inenkawl chhunzawm dawn. 

Trump hi helicopter hmangin hospital aṭangin phurh haw a ni a, helicopter-a a chuan lai hian a mask vuah mah se, White House a thlen hnuah thla a lak dawnin a mask a la thla a, hei hian sawisel a hlawh zui hle. 

Donald Trump chuan coronavirus chu la kai mah se, a ṭha hle tih a sawi. A enkawltu, medical team chuan kum 74 mi, President Trump hian darkar 82 chuang  khawsik a nei tawh lo a, a oxygen level pawh a pangngai tawh niin an sawi. White House physician, Dr Sean Conley chuan President hi White House-a damdawi lam thiamten uluk taka an vil reng tur thu a sawi. 

Hospital a chhuahsan hmain Trump chuan a twitter-ah inthlan neih tur atana campaign a chhunzawm leh thuai theih tur thu a sawi.  White House a thlen hnuah America mipuite chu Covid-19 hlau lo tur leh, he hri leng hi inhneh tir lo turin a chah zui a ni. 

Trump hi damdawi-inah hian doctor-te chuan antiviral drug remdesivir bakah na zualte enkawlna atana hman dexamethasone hmangin an enkawl nia sawi a ni. Remdesevir hi ni nga course a nih avangin White  House-ah pawh enkawl chhunzawm a la ni dawn a, hun eng emaw chen chu a inkhung hran a la ngai dawn bawk.