Israel-in Gaza-a Hamas helpawl hmun an kap

Gaza Strip aṭanga Israel lama rocket  kah luh vangin Israel aircraft-te chuan Gaza chhim lama awm, Hamas helpawl  hmun chu Thawhṭanni tlai lam khan an kap let ve nghal. 

Israel media-te tarlan danin Hamas ho hmun an kahnaah hian thi leh hliam an awm lo a, thil chhia lian tham pawh a awm lo. Israel aircraft-te hian mihring leh bungrua awm lohna hmun an kap niin an tarlang. 

Thawhṭannia thil thleng tih loah chuan Gaza aṭanga rocket hmanga Israel kah hnuhnung ber chu September thla laihawl vek kha a ni. Hemi ṭum hian Israel chhim lamah rocket hi kah luh niin mi pahnihin hliam an tuar a ni. 

Israel-in Palestinian ram a luah, West Bank hmarchhak lam, Einav bula Israel sipai awmte chu Palestinian mi pathumin an beih thu Israel sipai chuan a tarlang. Heng mite hi an kah let nghal thu leh, pakhat chu an kap fuh a, midang pahnihte erawh chu an tlanchhe hman niin an sawi bawk. An kah fuh hi an man zui ta em tih erawh an tarlang lo.