Myanmar sipaite'n Rakhine state-ah airstrike nei

Myanmar sipaite chuan Thawhṭanni khan Rakhine state-a Minbya bialah airstrike an nei a, civil mi 20 chuang an thi. United Nations secretary-general, Antonio Guterres chu he thil thleng hian a ṭhawng hle tih UN thupuangtu chuan a sawi. Secretary General chuan buaina nasa zawk a chhuah chhunzawm lohna tura inbengdai vek turin pawl hrang hrangte chu a ngen thu a sawi bawk

Sipaite'n airstrike an neihna, Rakhine state-a Minbya bial hi sorkar sipai, Tatmadaw leh Arakan Army (AA) te inbeih nasatna hmun a ni a, thla liam ta khan AA kutah hian a awm a ni.

Thawhṭannia sipaite beihpui thlaknaah hian Muslim tamna, Thar Dar khua chu bitum a ni a, zing dar 1.45 velah fighter jet aṭangin bomb an thlak a ni. Bomb an thlakah hian khaw chhung mi 23 thiin, mi dang 18-in hliam an tuar bawk. Tualchhung mite chuan jet fighter hian bomb a thlak hnuah pawh vawi eng emaw zat an khua hi a kap zui bawk niin an sawi a, an khuaah inbeihna engmah a awm ve lo chungin sipaite hian an rawn bitum tho niin an sawi.

Arakan Army hian Pauktaw, Minbya, Mrauk-U, leh Ponnagyun township-te an thunun vek tawh a, heng hmunah hian sipaite chuan ni tin airstrike an nei bawk a ni.