Haiti : Gang-in khawpui an beihnaah ruang 12 chhar

An ram sorkar rorelna paihthla tura khawpui awp beh tuma bei mektu, Haitian gang-te chuan Haiti khawpui, Port-au-prince chu nasa zawkin an bei chhunzawm zel a, Thawhṭanni khan Port-au-prince daia Petion-ville-ah ruang 12 chhar a ni.

Ruang chharte hi ambulance hmanga lak an ni a, silaia kah an ni. Gang hi silai nena chein, khawpui hmun hrang hrang an bei a, Thawhṭanni khan Laboule leh Thomassin tlang dung vela chengte chu zing ni chhuah hmaa beiin, khua aṭang hian an nawr chhuak nia hriat a ni. Heng gang-te hian February 29 khan khawpui hi bei ṭanin, tan in an bei a, tan in aṭang hian tang sang chuang zet an tlan chhuak. Hemi hnu hian prime minister Ariel Henry ban an phut thu an sawi zui a, a zin mekna, Kenya aṭanga a lo let theih loh nan airport thunun tumin an lo bei tawh bawk a ni. Port-au-prince airport hi tun dinhmunah hman loha khar mek a ni bawk.

Haiti ram buaina avang hian UN bakah US leh Canada te chuan an embassy-a thawktute an la chhuak tawh hlawm a, US Department of State thupuangtu, Vedant Patel chuan Caribbean Community (CARICOM)-in Haiti-a thuneihna inhlan chhawnna tur, transitional council an din thuai a beisei thu a sawi. Khawvel ram hrang hrangte chuan Haiti-ah hian boruak ṭha a awm leh vat theih nan, gang-te bei let tur hian Kenya ram kaihhruai sipai tirh luh vat an duh thu an sawi bawk a ni.

PM Henry hian an ram rorelnaa thuneihna inhlan chhawn nan presidential council din a nih veleh a ban tur thu a sawi tawh a, mahse, Haitian gang-te chuan he council-ah hian tu mah tel lo turin vauna an tihchhuak a, tel lui an awm chuan indona a chhuah tur thu an sawi. Haiti-ah hian 2021-a president, Jovenel Noise thah a nih hnuah buaina a la reh thei lo a ni.