Kim Jong-un kaihhruaina hnuaiah NKorea-in rocket launchers enchhin

North Korea state media, Korean Central News Agency (KCNA) chuan an ram hotupa, Kim Jong-un kaihhruainain nuclear pai tel thei rocket launcher enchhinna an nei tih nimin khan a puang. He thu an puan hian South Korea leh Japan-te'n North Korea-in a ram thlang lamah missile enchhinna a nei nia ni hnih liam taa an tarlan chu a rawn nemnghet a ni.

KCNA chuan an thu puan nemngheh nan thlalak an tlangzar tel a, thlalakah hian rocket paruk an kap chhuak lai a lang tel a ni. An ralthuam enchhinte hi South Korea khawpui, Seoul kap pha tura duan a nih thu sawiin an ram ṭhenawm leh hmelma kumhlun SKorea vauna thu an chhakchhuak nghal bawk.

Kim Jong-un chuan an rocket launcher enchhinte chu an ralthuam pawimawh tak a nih thu sawiin, SKorea nen an inkarah indona a chhuak leh a nih pawhin Seoul khawpui kap pha a nih avangin Seoul chu a tichhe vek thei dawn a ni, a ti. South Korea Joint Chiefs of Staff (JCS) chuan nimin vek khan NKorea hian thlalaka an phochhuah aia tam rocket an kap chhuak niin a sawi ve leh bawk a ni.