Nobel Prize for Medicine dawng tur puang

Nobel Prize for Medicine, 2020 dawng tur chu Thawhṭanni khan puan a ni a, American scientist pahnih Harvey J Alter leh Charles M Rice bakah British scientist Michael Houghton te chu chawimawina sang dawng turin thlan an ni. 

Scientist pathumte hi Hepatitis C virus an hmuhchhuah vangin Nobel Prize for Medicine or Physiology 2020 dawng tura thlan an nih thu Thawhṭanni khan Nobel Committee hotu Thomas Perlmann chuan a sawi. 

Khawvelin hepatitis  natna a buaipui mek a, heng mithiam pathum te hian Hepatitis C virus chu an zirchiang a, hei vang hian thisen test-te pawh a theih tawh dawn a, damdawi thar tur pawh hmuhchhuah vat a rinawm a ni. An thil hmuhchhuah vang hian thinlian vanga thi thei dinhmuna ding mi tam tak nunna an chhan thei dawn a ni. 

World Health Organisation (WHO) tarlan dan chuan khawvelah hian hepatitis natna nei mi maktaduai 70 chuang an awm a, hepatitis thihpui hi kumtinin mi 4,00,000 vel an awm ṭhin bawk. He natna hi hun rei awh chi natna a ni a, he natna hian thin vung a siam thei a, cancer hial te pawh a thlen thei a ni.

Nobel Prize dawngtu hnenah hian gold medal leh prize money US dollar 11,18,000 (Swedish kronor mtd 10) pek an ni dawn a ni. Mahse mi pakhat aia tamin an dawn chuan an sum dawn hi insem tir a ni ṭhin. Nobel Prize hi physics, chemistry, literature, peace leh economics-a dawngtu turte pawh tun thla chhung hian puan an ni ang.