Maldives vice president hlui kum 20 tang turin hrem

Maldives vice president hlui, Ahmed Adeeb chu eiruk thubuai a neihah thiam loh chantir niin, kum 20 jail tang tur leh US dollar 1,29,892 chawi tura tih a ni.

Thawhṭannia a chungthu ngaih­tuahnaah, Maldives Criminal Court-a judge Hassan Saeed chuan Adeed hi sorkar fund hmang ru, pawisa tichingpenah leh vice president a nih laia a thuneihna hmang dik loa puhnaah thiam loh a chantir a ni, a ti.

Court-in thiam loh a chantirna zingah hian tropical island a hralh chungchang pawh a tel. He island hralh a nih dan chhui tur hian Maldives sorkar chuan asset recovery commission a ruat a ni. Mi tam tak chawlh hahdamna hmun island-te hi market price aia hniamin a hralh nia puh a ni a, hei vang hian Maldives sorkar chuan US dollar maktaduai 259 a hloh phah niin court chuan a tarlang. Adeeb hi Maldives sorkarin pawisa a hloh te chu pe let thei tura a inpeih thu court a hrilh. 

Kum 2015 September 28 khan an ram president hlui, Abdulla Yameen bomb hmanga beihna chungchangah inhnamhnawiha puh a nih vangin kha mi kum vek October 24 khan police-te chuan Adeeb hi an man a ni. Kum 2015 November 5 khan Maldives legislative body, People's Majlis-ah no confidence vote hmangin vice president a nihna aṭanga paih thlak a ni zui bawk.

House arrest-a hren a nih hnuah nikum July thla khan chhuah zalen a ni a, nikum vek August 1 khan Adeeb hi tugboat hmangin dan lo angin India-ah a lut a, India official-te chuan an lo hreng zui a ni. Indian Coast Guard-ten an thawn kir leh hnuah Maldives police-te chuan Adeed hi an man leh ta a ni. 

Kum 2015, July 23 khan kum 33 mi niin Adeed hi Maldives ram vice president a ni a, kha tih hun lai khan khawvela vice president ni thei naupang ber a ni.