Aung San Suu Kyi-i in lilamna chhangtu awm lo

Myanmar sipai sorkarin a hren mek, an ram hruaitu Aung San Suu Kyi-i in chu nimin khan court-in a lilamsak a, mahse, chhangtu an awm lo.

Kumin January thla khan Yangon-a Suu Ki-i villa hi a nuṭapa nen neitu nihna chungchanga hun rei tak buaina a awm avangin court chuan hralh turin thupek a tichhuak a ni. A man atan hian kyat tld. 315 (USD mtd 90) ruahman a ni.

Suu Kyi-i ukilte chuan a remtihna la hmasa loa lilam lo turin ngen mah se, nimin khan court official-te chu a in gate bulah hian kalin, lei duhtu an awm leh awm loh ṭum thum an zawt a, mahse, chhangtu tu mah an awm loh avangin lilam hun pawh hi an khar zui ve nghal bawk. An lilamna hmunah hian journalist, official leh undercover police-te chauh an tel.

Court-in lilam tura a tih, Suu Kyi-i in hi 54 University Avenue, Yangon-ah awmin, a seilenna leh, 1988-a democracy campaign bul a ṭanna a ni a ni a, a party, National League for Democracy headquarters hmasa ber atan hman a ni bawk. Sipai sorkar hnuaiah ṭum thum house arrest-a hren a nih pawhin he inah hian awmin, hren a nih chhung hi kum 15 zet a tling.

Colonial hunlaia sak, chhawng hniha sang hi kum 1953-a Suu Kyi-i nu hnenah pek a ni. Suu Kyi hi UK leh US-ah a awm ṭhin a, kum 1988 khan a nu hrisel tawh lo tak enkawl turin a haw a, he inah hian a cheng zui ta a ni. Kum 2000 khan a nuṭapa, US citizen, California-a khawsa Aung San Oo chuan in neitu nihna hi a rawn chuhpui a, court lamah pawh vawi eng emaw zat an kal tawh a ni. 2016-ah Yangon court chuan an ram zahve hi a pe a, mahse, in erawh Suu Kyi-i kutah a awm thung. A ram chin hralh a tumna chu ram dang khua leh tui nihna nei a nih tawh avangin Supreme Court in a phalsak lo a ni.