World Happiness ranking-ah Finland sang leh ber

Ram mipuite hlim dan tehna, World Happiness Ranking tihchhuah tharah Finland bawk chu mipuite hlimna ber ram a ni leh a, World Happiness Ranking-ah a zawnin kum sarih chhung pakhatna an ni ta.

Gallup leh an thawhpuite'n an buatsaih, World Happiness Ranking 2024-ah hian kum 12 chhunga a ṭum khatna atan US chu Top 20-ah a lang lo. US hi nikum khan 15-na a ni a, kuminah erawh 23-naah a tla thla. India chu 126-na a ni bawk. Ram 143 zir chian zingah kum 2020 aṭanga Taliban-te rorelna, Afghanistan chu a mawngphahah a awm.

World Happiness Report siamna atana tehfungah hian GDP per capita, ram mipuite hriselna leh dam rei dan, khawtlang inpuih tawnna, zalenna, mipuite thil phal dan leh eiruk/hlemhlet chungchanga an ngaihdante an hmang. Hemi atana data-te hi World Bank, World Health Organisation leh Gallup World Poll te lak khawm an hmang ṭhin a ni.

Top 10 ram zingah hian Netherlands leh Australia chauh chu mihring maktaduai 15 chuang awmna ram an ni a, Top 20-ah pawh Canada leh UK chauh chu mi maktaduai 30 chuang awmna an ni.