Tuilian leh leimin avangin Papua New Guinea-ah mi 23 an thi

Papua New Guinea-a National Disaster Centre (NDC) director, Lusete Man chuan an rama ruah sur nasa avang leh, tuilian avangin mi 23 an thi tawh niin a tarlang.

NDC chuan Papua New Guinea hmun sang lam deuha khuate chuan ruah sur nasa avanga leimin an tuar thu leh, leimin avanga kawng a chhiat nasat thu an sawi. Hetiang tho hian tuipui kam lamah pawh tuilian avangin kawng a chhia a, in tam tak chu tuilian hian lain, thlai chinna huante pawh tuilian hian a tichhe tel bawk niin an tarlang.

Thuneitute chuan ruang an chhar 23-te hi leimin nasa karah an hai chhuah theih hram thu an sawi a, Chimbu chhim lam gulf province-a chengte pawh tuilianin a chim tawh thu an sawi tel bawk. Tuilian hian Lese Kavora khuaa thlai an tharna huan a tihchhiat bakah, tui thianglhim an neihte a tibawlhhlawh bawk a, hemi khuaa chengte chuan an khaw sawn dan tur an ngaihtuah mek a ni. Kavora khaw mite chuan khawvel sik leh sa inthlak nasa avangin tuilian an tawrh vawi khatna a nih loh thu leh, tuipui chim chin chu a san belh zel bawk niin an sawi.

Papua New Guinea hi 2022-a World Risk Index, khawvel ram hrang hrang sik leh sa inthlak avanga dinhmun hlauhawma ding, an dinhmun hlauhawm dan a tihchhuah zingah 16-na an ni a, ramngaw (rain forest) la ṭhatna hmun anga chhiarin, khawvel pumah ramngaw nei ṭha pathumna a ni. Hetih lai hian palm oil chin avang leh ram dang aṭanga timber company-te an luh zel avangin an ramngaw hi a chereu zel a ni.