Russia-in missile hmangin Ukraine khawpui a bei

Ukraine khawpui Kyiv chu nimin khan Russia-in missile hmangin a kap a, mi 10-in hliam an tuar niin Ukraine official-te chuan an sawi a, Russia beihna avang hian chenna hmun tam tak tihchhiat niin, thil siamchhuahna hmunte pawh tihchhiat a nih thu an sawi bawk.

Military administration-a an hotupa, Serhiy Popko chuan nimina Kyiv beihna chu kar eng emaw zah hnua Russia-in nasa taka Ukraine a beih lehna hmasa ber niin a sawi. Russia chuan Ukraine khawpui beih nana an missile hmante chu ballistic leh cruise missile niin a sawi bawk.

Popko chuan,"Ni 44 an chawlh lailawk hnuah kan hmelmate chuan missile hmangin Kyiv chu an rawn bei leh ta a ni" tiin, an hmelmate chuan kil hrang hrang aṭangin Kyiv chu missile hmangin an rawn kap niin a sawi. Ukraine air force commander chuan Russia-in missile 31 a kah chhuah chuan an tum an fuh hmain Ukraine air defence system chuan a kap thla hman vek niin a sawi. Kyiv Mayor Vitali Klitschko chuan Russia missile kah chhuah avang hian mi 10 velin hliam an tuar niin a sawi a, missile them nawi hian chenna hmun leh thil siamchhuahna hmunte a deng fuh a ni, a ti.

Ukraine president, Volodymyr Zelenskyy chuan khawthlang ramte chuan Ukraine chu puih a ngai hle a ni tih hria se a duh thu a sawi. Zelenskyy chuan,"Hetiang pawikhawihna hi chhun zanin a thleng reng a, khawvel ram hrang hrang an ṭanrual chuan an titawp thei a ni" a ti. Ukraine President chuan khawthlang ramte chu missile laka an invenhim nan air defence system pek belh turin ngen nghal bawk.