Indonesia President thar tur Prabowo Subianto

Indonesia general election commission chuan February 14-a an ram President thar tur thlannaa vote tlate chu chhiar zawh ni tain, special forces general hlui, defence minister ni lai Prabowo Subianto chu thlan tlin a ni tih a puang.

Subianto hian vote tla aṭangin 58.6% a hmu a, candidate dang - Jakarta governor hlui, Anies Baswedan chuan 24.9% leh, central Java governor hlui Ganjar Pranowo chuan 16.5% an hmu ve bawk. Candidate tling zo ta lo pahnihte hian inthlanah hian thil dik tawk lo a awm niin an sawi a, inthlan result hi constitutional court-ah khin an tum tih an sawi.

Commission chuan khawvela democracy ram lian pathumnaa inthlan neihah hian vote 80% vel a tla niin a sawi. Subianto hian province 38 zinga 36-ah hnehna changin, vote mtd 96.2 a hmu tling. Pahnihna Baswedan hi province pahnihah chakin, vote mtd 40.9 a hmu bawk. Subianto hian a thawhpui, vice president candidate atan Indonesia president ni lai, Joko Widodo fapa, Gibran Rakabuming Raka a hmang a ni.