Vietnam President Vo Van Thuong a bang

Vietnam-a rorel lai, Communist Party chuan an ram President, Vo Van Thuong chuan kum khat vel chauh office la luah mah se, dan bawhchhiatna leh amah duh khawp lohna avangin a bang tih an puang. Thuong hi kum hnih chunga Vietnam president bang pahnihna a ni.

Vietnam-a Communist Party-te chuan Vo Van Thuong-a banna theh luh hi an pawm thu tarlangin, Communist Party-te tan sulhnu ṭha lo tak a hnutchhiah thu an sawi zui a ni. Sorkar hian Thuong-a duh khawp lohna tia sawi hi an sawi zau zui lo a, mahse, an rama eirukna nasa tak thleng mek titawp tura eiruk dona beihpui thlak mek nen inzawmna neia ngaih a ni. Thuong hian banna a theh luh hma hian, kar khat chhung vel chu ban a nih tur thu hi sawi rik a awm tawh a ni. Nikum khan Vietnam president, Nguyen Xuan Phuc chu an party-in dan bawhchhiatna leh thil dik lo tia an puh avangin a lo bang tawh a, thla khat hnuah Thuong hi a aiawh tura lak luh a ni ta a ni.

Vietnam-ah hian eirukna do leh chhui chhuak tura beihpui thlak mek niin, hei vang hian politician senior tam tak an ban phah tawh a, sumdawnna lian tak tak neitute pawh man niin, thu zawh fiahnate neih a ni. Vietnamese police-te chuan kar tir lam khan central Vietnam-a Quang Ngai province hruaitu hlui chu kum 10 kal taa eiruk thubuaiah an lo man tawh bawk.