Blinken leh Saudi Crown Prince-te'n Gaza chungchang sawi dun

Middle East tour nei mek, US secretary of state Antony Blinken chuan nimin khan Riyadh, Saudi Arabia-ah Saudi Crown Prince Mohammed bin Salman leh foreign minister Prince Faisal bin Farban-te a hmu a, Gaza Strip dinhmun tawn mek leh, indona tuartu Palestinian-te chhawmdawlna pek luh tihpun dan turte a sawipui.

Antony Blinken hian Nilaini aṭang khan Middle East tour hi a nei leh ṭan a, hei hi Gaza Strip-a Israel leh Hamas indona a thlen hnuah middle east a tlawh ṭum rukna a ni. Saudi Arabia hi pan hmasa berin, nimin khan Saudi hruaitute a kawm hnuah Egypt lam a pan leh nghal a ni. Egypt ram hruaitute nena an inkawm hnuah, vawiin hian Israel a pan leh ang.

Blinken hian Gaza Strip-a inkahhai puan a nih theih dan tur te, mipuite tana chhawmdawlna tam zawk thawn luh a nih theih dan tur te Middle East ram hruaitute hi a sawipui dawn a ni. Hamas leh Israel inkara inkahhai puan a nih theihna tur hian US leh ram dangte pawhin hma la reng mah se, tun thlengin inremna hi an la siam thei lo a ni.