North Korea missile test a hlawhtling lo

North Korea chuan nimin zing khan an ram khawchhak lam tuipuiah missile a enchhin a, mahse a hlawhtling lo niin US leh South Korea official-te chuan an sawi.

Nimina rocket kahchhuah a tum hi eng ang nge hriatchian ni lo mah se, Musudan medium-range ballistic missile nia sawi a ni a, BM-25 nia sawi a ni bawk. North Korea ram dintu Kim Il-sung piancham pualin missile test hi neih a tum a ni. Kim Il-sung hi tuna North Korea ram hotu, Kim Jong-un-a pu a ni. Kum li kalta khan Kim Il-sung piancham lawmna atan hian missile kahchhuah an lo tum tawh a, hemi ṭum pawh hian an hlawhtling lo.

Report chuan NKorea hian Musudan missile enchhin a tumna hmasa ber a nih thu a sawi a, nimin ami bak hi a dang 50 a la nei niin a tarlang bawk. Musudan hi an kahchhuahna hmun, NKorea hmarchhak lam tuipui kama khaw pakhat hming chawia phuah a ni.

Musudan missile hi km 3,000 chin kap theia ngaih a ni a, Pacific-a Guam thliarkar-a US Army base a kap pha dawn a, mahse US ram laili lai erawh a kap phak lo. US chuan NKorea missile test hnuhnung ber chungchang hi a chhui zui nghal tih sawiin, a la finfiah lo niin a sawi.

State Department official chuan North Korea chu a laka hrekna hman mek dodal zawng leh, boruak ṭha lo zawk siam thei zawnga thil ti lo tura an ngen nawn leh thu a sawi. NKorea ram ṭhianṭha, China pawhin NKorea-in missile a test leh nia sawi chu ṭha lo a tih thu sawiin, hetiang thil tih hian an ram chu eng dinhmunah mah a thlen dawn lo a ni, a ti.

Report chuan NKorea missile kahchhuah hi hlawhtling lo mah se, US kah phakna tur ralthuam a nei a tihlanna kawng khat leh, a technology neihte a pholanna pakhat nia ngaih a nih thu a sawi. South Korea leh US sipaiten nunchan an zirho mek chu NKorea hian a ngaimawh hle a, vauna thu pawh a chhakchhuak fo a ni.