Brazil court-in President dilna a hnawl

Brazil Supreme Court chuan President Dilma Rousseff-in Congress-a amah banna tur ngaihtuaha vote lak tum tikhawtlai tura a ngenna chu a hnawlsak a, Pathianni hian ruahman lawk angin vote lak a ni ang.

Ningani khan court chuan President ngenna hi a ngaihtuah a, sorkar ukil chuan President hi amah insawifiahna tur hun an pe ṭha tawk lo tiin a ṭang. President ngenna hi judge ṭhenkhat chuan thlawp mah se, a thlawp lo lam an tam zawk avangin vote lak tur hi kal tlangpui a ni dawn ta a ni.

Congress-in President ban hi a remtih chuan Senate-ah ngaihtuah leh a ni ang a, Senate-in a lo pawm chuan Rouseff-i ban nghal tur niin a aiawh turin Vice President Michel Tremer chu lakluh a ni ang.

President ban tir tumna hi tlang tur chuan eptute hian Congress-ah vote 342 an hmuh a ngai. President ban duhtu hi 333 an awm tawh a, vote kua an la mamawh belh a ni. President thlawptu lamah member 124 awmin, thutlukna la siam lo member 56 an la awm bawk.