Ukraine parliament-in PM atan Volodymyr Groysman pawm

Ukraine Parliament chuan parliament speaker Volodymyr Groysman chu an ram prime minister thar atan a pawm.

Arseniy Yatsenyuk chuan Pathian≠ni khan PM aṭanga a ban tur thu hi a puang a, President Petro Poroshenko chuan a banna hi pawmin amah thlaktu tura ruat hi Parliament member-te chuan an thlang a ni. Parliament-a vote lakah member 257 chuan PM atan Groysman hi an pawm a, a pawm lo lamah vote 50 a tla.

Prime Minister atana thlan thar Groysman hi President Poroshenko-a party mi a ni a, a nu leh pa chu Juda niin Ukraine khawthlang lam, Vinnytsia-a cheng an ni. Sawiseltu lam chuan PM thar hi politics lama hnuhma la ngah lo, an ramin in≠thlak danglam a ngaih meknaah nawr kal thei tura an ngaih loh thu an sawi. Hetihlai hian a thlawptu lam chuan politics lama lar chho mek a ni a, Ukraine rama pawl hrang hrangte suihkhawm theitu tur leh, EU thlawpa an ram dintharna tur programme kalpui thei tur nia an ngaih thu an sawi thung.

Volodymyr Groysman hi Ukraine prime minister ni thei zing≠a naupang ber dawttu niin, kum 38 mi a ni. Nupui neiin fa pathum a nei a, mahni anpui inkawp leh inneih phalna dodaltu lian tak a ni. Kum 2006 khan Vinnytsia mayor atan thlan a ni a, a thuneihna hnuaiah he khawpui hian nasa takin hma a sawn phah nia sawi a ni.