Japan chhim lamah magnitude 6.4 a nain lir a nghing

Japan chhim lamah Ningani zan khan magnitude 6.4-a nain lir a nghing a, lirnghingin chhiatna a thlenah mi pakua an thi a, midang 250 in hliam an tuar. In tlu eng emaw zat a awm a, power supply pawh a chhe bawk.

Lirnghing inṭanna hi chhim lama khawpui, Kuammoto chhak lam km 19-a thukah a ni a, minute 40 hnuah after shock magnitude 5.7-a na leh, zanlai velah magnitude 6.4-a nain a nghing leh a ni. Japan seismology office chuan lirnghing nat zawng hi 6.4 nia sawi ni mah se, hmun ṭhenkhatah chuan kum 2011-a magnitude 9-a naa lir a nghin ṭum ang vel khan a insawi nasa niin an sawi.

Chief Cabinet Secretary Yoshihide Suga chuan lirnghing vangh hian in 19 a chim a, a nghinna bial chhunga chhungkaw 16,000 vel chuan electricity an nei lo a, chhungkaw 38,000 velin gas an nei lo bawk niin a sawi.

Ningani zan khan mi 44,000 vel chu an chenna hmunah awm zui ngam loin community centre ah an riak a ni. Kumamoto khawpui chhungah kawngpui khi eng emaw zat a awm a, khawpui laili taka Kumamoto Caste inchung pawh a chhia a ni.

Lirnghing tuarte chhan≠≠chhuah leh chhawm≠dawl hna thawk turin sipai, police leh kangṭhelhtu mi 3,000 tirh nghal an nih thu Japan Prime Minister Shinzo Abe chuan a sawi a, a ṭul chuan tirh belh leh an ni ang, a ti.

Japan ramah hian linghingin chhiatna rapthlak tak a thlen fo tawh a, kum 2011 khan magnitude 9.0-a nain Japan hmarchhak lamah a
nghing a, tsunami rapthlak tak thlen zuiin mi 18,000 in an thih phah a, tuifawn nasa takin Fukushima nuclear plant a tihchhiat avangin radiation a put a, hun rei tak chhung buaipui zui a ngaih phah a ni. Radiation put vang hian nuclear plant chhehvela cheng mi 100,000 chuang chu hmun dang≠ah insawn chhuakin tun thlengin an la kir thei lo.