Ecuador-ah magnitude 7.8-a nain lir a nghing Japan-ah lir nghing nawn leh

South America ram, Ecuador-ah Inrinni zan khan magnitude 7.8-a nain lir a nghing a, lirnghing vanga chhiatna thlengah mi 41 an thi. Lirnghin hun hi an ram sanaa zan dar 8 vel a ni a, tuipui kam khawpui Muisne chhimchhak lam km 27 vela hla, leichhung km 19.2 a thuk aṭang nghing ṭan a ni. Lirnghing vang hian province parukah emergency puan nghal a ni a, chhanchhuah leh chhawmdawl hna thawk turin National Guard-te tirh an ni.

Ecuador rama lirghing hian an ram khawpui lian ber, Guayaquil-ah lei lia ber a tihchhia a, an ram khawpui Quito-ah pawh lirnghing hi an hria a ni. Manta khuaa airport tower a sawi chhia a, an rama oil refinery lian ber pawh venthawn thilah khar nghal a ni bawk. Hydroelectric dam leh oil pipeline-te pawh khar an ni.

Lirnghing hian Guayaquil khuaah chhiatna a thlen nual a, hmun ṭhenkhatah power supply a tawp bawk. He khuaa cheng mi tam tak chu khaw dangah an tlanchhia a ni.

Pacific Tsunami Warning Center chuan lirghingin tuifawn na tak a thlen mai thei niin an sawi a, mahse hemi chungchangah hian sorkar chuan hriattirna a tichhuak lo.

Japan-ah lir nghing nawn :

Japan ramah pawh kar kalta Ningani-a magnitude 6.2-a naa an ram chhim lama lir a nghin hnuin, Inrinni khan ṭum hnih na takin a nghing leh. Japan chhim lam bialah lirnghing vang hian mi 32 an thi a, in eng emaw zat a sawi chhiat bakah hmun tam takah lei a min bawk. US Meteorological Survey chuan Inrinni-a lirnghing nat zawng hi magnitude 7.0 vel niin a sawi. Japan Meteorological Agency chuan Inrinni-a lir nghing chu tunlaia an rama lirnghing nat ber ṭum a nih thu a sawi.

Japan sorkar thupuangtu, Yoshihide Suga chuan Inrinni khan Kyushu thliarkar chhim thlang lamah ṭum hnih na taka lir a nghin leh vangin mi 1,500 chuangin hliam an tuar a, an zing ai 80 chu an hliam na hle niin a sawi. Lirnghing tuarte chhanchhuah hna thawk tur hian sipai 20,000 tirh leh an ni dawn tih a sawi a, chhim thlang lam biala police leh kangṭhelhte pawh lirnghing tuarte ṭanpui tur hian tirh an ni.

Media report chuan Japan rama tlangkang thlen ngunna ber, Mount Aso pawh a kang leh niin an sawi a, hei hi thla khat chhung tlangkang a thlen ṭum khatna a ni. Mount Aso aṭang hian meikhu meter 100-a sangah a invawrh chhuak a, mahse chhiatna a thlen hriat a ni lo.

Japan rama lirnghing nawn leh tlangramah leimin nasa tak hian chenna in tam tak tichhia a ni. Japan Prime Minister Shinzo Abe chuan chhiatna thlen dan kimchang an la hre lo a, lirnghing hian thil a tichhe nasa hle nia an hriat thu a sawi.

Kar kalta Ningani-a lir a nghin hnu khan mi 44,000 vel chu sorkarin awm lailawkna tur a siamah an la khawsa mek a ni. Ningani-a lirnghin hnu hian aftershock ṭum 230 zet a thleng tawh bawk.

Japan ramah hian lir a nghing fo a, kum 2011 March thla khan magnitude 9.0-a nain lir a nghing a, tuifawn nasa tak thleng zuiin mi 18,000 in an thihphah a ni. Tuifawn hian Fukushima nuclear plant a sawichhiat avangin radiation a put a, plant awmna chhehvela cheng mi 100,000 chuang chu hmun him lamah sawnchhuakin tun thlengin an la kir thei lo a ni.