Gaza-ah inkahhai puan a nih theih nan US-in UNSC-ah resolution a pu lut dawn

Gaza Strip-a thla nga chhung indona thleng tawh chu chawlh lailawk a nih theih nan, United States chuan United Nations Security Council (UNSC) ah resolution a pu lut dawn. Hei hi Israel leh Hamas indo ṭan a nih hnua US-in Israel chet dan kalh zawnga hma a lak vawi khatna a ni.

UNSC-ah hian Gaza-a inkahhai puan a nih theih nan resolution lutte chu US hian a veto hmangin a lo hnawl ṭhin a, mahse, tunah erawh inkahhai a awm theih nan US ngei chuan resolution hi a pu lut ve thung a ni. Resolution hi vawiin hian pu lutin vote thlak nghal beisei a ni.

Inkahhai puang tura UNSC-a resolution lut hnuhnung ber, February thlaa mi a hnawl hnuin US chuan ama put luh tur ngei resolution chu a buatsaih ve nghal a, kar ruk chhung inkahhai puan a, chumi chhunga tang inthleng a nih theih nana hma la turin UNSC chu a ngen dawn a ni. An resolution put luh turah chuan inkahhai puan thuai chu civil mite him nan leh, chhawmdawl hna ṭha taka thawh a nih theih a, mipuite tawrhna a ziaawm theih nan an mamawh tak zet tiin an ziak.

US chuan Israel chu thlawp ṭhin mah se, khawvel ram dangte nawrna avangin Israel chet dan tihtawp lailawk a nih theih nan hma an la ve dawn ta a ni. US Secretary of State, Antony Blinken chuan ram dangte pawhin an resolution chu an thlawp ngei a beisei thu a sawi.

Russia chuan US resolution put luh tum chu a nem mah mah tiin a sawisel ve thung. Russia chuan resolution-ah chuan inkahhai puang ngei tura inziahna a awm loh thu sawiin inkahhai lailawk puan chu a ngai tih hawi zawng ringawta a inziah thu an sawi. UN Russia Deputy Ambassador Dmitry Polyanskiy chuan inkahhai puang ngei tura nawrna resolution a ni lo chu pawm harsa an tih thu a sawi a ni.