Khawvel pumin min hawisan mah se, Rafah-ah IDF-te'n beihpui an thlak dawn : Israel Minister

Israel-in Gaza Strip chhim lam, Rafah-a beihpui thlak a tum chu ram hrang hrangte'n sawiselin, kaltlangpui lo turin an nawr reng a ni. Hetih lai hian Israel strategic affairs minister Ron Dermer chuan Hamas firfiakte tichhe turin Israel Defence Force (IDF)-in Rafah-ah hian beih pui an thlak dawn tho tih a sawi.

Ron Dermer chuan, "Khawvel pumin min hawisan mah se, US nena kan inlaichinna pawhin tuar dawn mah se, Rafah-a Hamas-ho kan beihna tur hi kan kaltlangpui dawn," a ti. Dermer hi kar leh lamah US-ah zinin, US ram hruaitute a kawm dawn a ni.

"Kan hma lak tawhna hi kan zo fel dawn, hemi hrethiam lo chuan Juda-te thazam khawihsak an ni tih an hrethiam lo tihna a ni," tiin nikum October 7-a Hamas-te'n Israel an beih chungchang a rawn sawi lang. Israel chuan Hamas nuai chimit chu a la tum reng tih a sawi. Ram hrang hrangte thurawn te pawh an ngaithlaksak zel dawn tho tih a sawi a, hemi rual hian Hamas nuai bona awm chhun chu tuna an la chakna bial, Rafah-a beih chauh chu a ni tih a sawi zui. US bakah Israel ṭhian ṭha ram dang pawhin Hamas nuai bo chu an duh a, mahse, an duh dan ang chuan kar thum chhunga zo tur leh, civil mi thihna thlentir loh an duh a ni, a ti.

Tun hnaia Canada-in Israel hnena ralthuam a hralh ṭhin titawp a, ralthuam pe chhunzawm tawh lo tura thutlukna a siam chungchang pawh sawi chhuakin, 'An chet dan hi Canada tan zahna a la ni zel dawn," tiin, Israel-in hun harsa ber a tawn mek laia Canada-in a phatsan chungchang hi kum tam tak chhung mipuite'n a la zawt let reng dawn a ni, tiin a sawi.