Indonesia-ah Rohingya raltlan 69 chhanchhuak

Indonesia-a Aceh province-a tuipuiah Rohingya raltlan 150 vel chuanna lawng a chesual a, KontraS Aceh Commission for Missing Persons and Victims of Violence chuan lawng chetsualnaa tel, mi 69 chhanchhuah an nih thu an tarlang.

Lawng chetsualna hmun hi Aceh thlang lam, Kuala Bubon tuipui kam aṭanga km 12-a hla a ni a, lawng chetsual chhan hi hriat ni lo mah se, Bangladesh aṭanga Rohingya raltlante'n an hman ṭhin lawngte hi thing hlui tawh tak aṭanga tuk chawp a nih ṭhin avangin lawng pilna chance hi a sang bik nia ngaih a ni. Lawng chetsual hnu hian Acehnese sangha mantute chuan hmeichhe pali leh mipa pahnih an chhan thu sawiin, heng mi parukte hi UN refugee agency (UNHCR) palai, Faisal Rahman chuan kawmin, mi ṭhahnem tak tuiah hian an tla nia an sawi thu a tarlang. Indonesia-a National Search and Rescue Agency chuan tui tlate chhan leh zawng tur hian lawng an tir nghal a, mahse lawng pilna hmun tak hi hriat a har tawh thu a sawi a ni.

Lawng chetsualnaa thi zat hi chiang taka hriat theih a ni lo. Lawngah hian mi 150 vel an chuang nia hriat a ni. Mi 69 dama chhanchhuah zingah hian mipa 42, hmeichhia 18 leh naupang pakua an tel.