Russia : Moscow-a concert hall beitu mi 4 man an ni

Russia khawpui, Moscow khaw daia Crocus concert hall chu ISIS firfiakte'n kar liam ta Zirtawpni zan khan beiin, mi 62-in nunna an chan a, mi 145-in hliam an tuar. Inrinni khan pawikhawihtu mi pali chu man an ni nghal. Russia president Vladimir Putin chuan he pawikhawihnaa inhnamhnawih dangte pawh chhui a, man ngei a tiam.

ISIS firfiakte hian silaia mipui an kah hnuah hian hall hi an hal leh niin a hmuna awmte chuan an sawi a, hall vengtu guard-te hian silai an kawl loh avangin firfiak kuta thi pawh an awm niin an sawi bawk. Russia special force leh riot police-te an thlen hmain firfiakte hi an tlanchhe hman a, firfiakte hi um zui zel an nih thu police-te chuan an sawi a ni.

Crocus City Hall beitu firfiakte hian concert hall hi luh chilhin, he hmun tlawhtute chu silaiin an kap a, silai an pawng kah avang hian kangmei a chhuah zui phah bawk. Crocus hall-ah hian mi 6,200 vel leng niin an sawi a, Zirtawpni zan khan Russia rock band, Picnic-te chuan concert neiin, concert chhim tura kal khawm mipuite hi firfiakte hian an bei ta a ni.

Russia Investigative Committee chuan firfiakte hi chhui zuiin, Russia president, Vladimir Putin chuan concert hall beihna a inhnamhnawih ni a rinhlelh kai mi 11 an hren mek thu sawiin, firfiakte chetna chu nunrawnna leh suahsualna a ni, a ti.

Moscow beihna kaihhnawihah hian Russia-a US embassy chuan March 7 khan thuchhuah siamin, firfiakin Russia beih an tum nia an hriat thu an sawi. US National Security Council thupuangtu, Adrienne Watson chuan ISIS-in Moscow beih an tum nia thu hriat ruk an neih thu Russia sorkar hi hriattir tawhin, Moscow-a US mite pawh mipui pun khawmnaa kal lo turin hriattirna an lo chhuah tawh bawk a ni.

Moscow-in beih a tawh avang hian Moscow-a infiamna lian tham bakah, mipui pun khawm tam ngai chi lam ruahmanna awm sate chu tihtawp rih nghal vek a nih thu an puang. Russia foreign ministry spokeswoman, Maria Zakharova chuan suahsualna rapthlak tak a ni tiin, khawvel ram hrang hrang hruaitute chu firfiakin Russia an beihna dem a, hetiang thil a thlen fo loh nana hma la turin a ngen a ni. Moscow concert hall beihna hi UN chuan pawi a tih thu leh, firfiaka chetna chu a dem thu puangin, ram hrang hrang; Spain, Italy, France leh EU-te chuan an dem thu an chhuah chhunzawm ve bawk.