India nena kan insumdawn tawnna thar thawh a ngai : Pakistan Foreign Minister

Pakistan foreign minister, Muhammad Ishaq Dar chuan India leh Pakistan insumdawn tawnna chu thar thawh leh a ngai tawh niin a sawi. Dar hian London-a thuthar thehdarhtute a kawmnaah he thu hi a sawi a ni.

India-in Jammu & Kashmir inhung bikna, Article 370, a ram danpui aṭanga a paih duh lohna lantir nan Pakistan hian ram pahnih insumdawn tawnna hi a titawp a ni. Ram pahnih inkara sumdawnna che vel chu August 2019 hnuah chhunzawm leh a hun tawh niin Dar chuan a sawi a,"Pakistan-a sumdawngte chuan India nena insumdawn tawn leh tawh an duh a ni" a ti. Pakistan chuan ram pahnih inkara sumdawnna chu ngunthluk takin a ngaihtuah ṭha leh dawn niin a sawi.

Jammu & Kashmir inhung bikna India sorkarin a tihtawp hnu hian Pakistan nena an inṭhian ṭhatna chuan hniam lam a pan zui ve nghal a, a ram chhung anga J&K ngaitu Pakistan chuan India nena inlaichinna a neihte chu a chhu chat zui ve nghal a ni. Hemi hnu hian ram pahnih inkar chuan ziaawm lam a pan ve hret hret reng a, kum 2021 khan India leh Pakistan ramri, Line of Control (LoC) ah ram pahnih chuan 2003 a inremna an neih angin inkahhai an remti a ni. Ram sum dinhmun chhiat avanga harsatna tawk mek Pakistan chuan tunah hian an dinhmun siam ṭhat nan India nena insumdawn tawnna thar thawh leh an tum mek niin a ngaih theih.