Israel-Gaza war : Ramadan laia inkahhai puan nan UN-ah resolution pu lut

Gaza Strip-a Israel leh Hamas te indona thleng mekah, Muslim thla serh, Ramadan hun laia inkahhai puan a nih theih nan United Nations Security Council (UNSC)-ah nimin khan resolution put luh leh a ni.

Indona tuar mektu, Gaza-a civil mite tana chhawmdawlna tam zawk thawn luh a nih theih nan inkahhai puan hi a ṭul tawh hle nia sawi a ni.

Hetih lai hian kar liam ta Zirtawpnia US-in Gaza-a inkahhai puan a nih theihna tura UNSC-a resolution a put luh chu Russia leh China chuan an veto hmangin an lo hnawlsak tawh a ni. US hian nimina resolution put luh hian US, Egypt leh Qatar kaihhruaia inbiakna neih mek a tiṭhuanawp thei nia an sawi avangin a veto hmanga a lo hnawl ve mai a rinawm hle bawk.

Resolution hi UNSC-a tel ram 10 intiamrualin an put luh a ni a, Russia leh China bakah Arab Group (Arab ram 22 intel khawm) chuan resolution hi put luh turin an thlawp a ni. Arab Group hian thuchhuah siamin, UNSC member ram 15-te chu thisen chhuahna thleng mek tihtawp a nih theih nan leh nunna tam tak an chhan theih nan inlungrual tak leh thil tikhawtlai loa resolution chu pawm vek tura an duh thu an tarlang. "Inkahhai puan a ṭul hun chu thui takin kan pel tawh" tiin Arab Group chuan an sawi.

UNSC-ah hian Gaza-a mihring dikna chanvo tihchhiata awm mek chungchangah resolution pahnih pawm ni tawh mah se, inkahhai chungchanga resolution lut erawh pawm a la awm lo. Ramadan hi April 9 thleng hman a ni dawn a, resolution lut hi pawm a nih pawhin kar hnih bak inkahhai puan a ni dawn lo tihna a ni.