Brazil-a ruah leh thlipui thawkah mi 25-in nunna an chan

Brazil-a Pathiannia ruah leh thlipui nasa tak thawk avangin, mi 25-in nunna an chan tawh a, chhanchhuah hna thawh mek ni mah se, ruah nasa zawk a la sur dawn niin mithiamte chuan an sawi.

Brazil chhimchhak tlang dunga tangkhangte chhanchhuah nan thlawhtheihna leh lawngte tirh a ni a, helai hmun bakah hian Rio de Janeiro leh Espirito Santo-ahte chuan ruah leh thlipui thawk avanga nunna chan hi an pun belh mek a, ruah sur nasa avang hian tui a lian bawk niin thuneitute chuan an tarlang. Espirito Santo chhak lama mihring 25,000 vel chenna, Mimoso do Sul chuan ruah leh thlipui thawk hi an tuar nasa ber a, Espirito Santo-ah hian nunna chan mi 17 an awm a ni. Thuneitute chuan mi 5,200 zet chu an chenna in aṭanga hmun him lamah sawn chhuah an nih tawh thu an sawi bawk.

Brazil president, Luiz Inacio Lula da Silva chuan khuarel chhiatna chu sik leh sa danglam chak avanga a nasat zel thu sawiin, thihna thleng avanga pawi a tih thu a sawi a, sorkar chuan mipuite venhim, chhiatna naza zawk thleng thei ven leh a chhia siam ṭhat hnate chak taka kalpui nghal an tum thu a sawi. Governor Renato Casagrande pawhin chhiatna an tawh mek karah chhanchhuah hna thawk mek mah se, hmun ṭhenkhat chu tlawhpawh a la harsat thu a sawi.