Nigeria-a zirlai 137 ruk bote chhuah an ni

Nigeria sorkar chuan March 7-a Kaduna state-a Kuriga khua aṭanga silai kengte'n an ruk bo, zirlai 137-te chu chhuah an ni tih a sawi.

Sorkar thupuangtu, Abdulaziz Abdulaziz chuan Pathianni khan heng zirlaite hi him taka chhuah an nih thu leh, an hriselna dinhmun pawh a ṭhat thu a sawi. Hetih lai hian media report tam zawkin zirlai 286 leh staff member pakhat ruk bo nia an sawi chu an report dik lo niin a tarlang.

Kaduna state governor, Uba Sani chuan national security adviser ruahmanna anga security operation an neih hnuah, zirlai hren beh mekte hi chhuah an ni tih a sawi a ni. Zirlai naupangte him taka chhanchhuah an nih theih nana bang loa lo ṭawngṭaisaktute chungah lawmthu a sawi nghal bawk.

Zirlai ru botute hian kar liam ta khan an zirlai leh staff hren mekte chhuah an nih theihna turin naira tld 1 (USD 680,000) an phut a, an pek loh chuan ni 20 chhunga an thah tur thu an sawi. Mahse Nigeria president Bla Tinubu chuan cheng khat pawh a pe dawn lo tih sawiin, zirlaite hi chhanchhuah an ni ta a ni.

Nigeria ramah hian armed group hoin zirlai an ruk bo hi a thleng fo a, March 9 khan Sokoto state-a Gidan Bakuso khuaah school aṭangin zirlai 15 ruk bo an ni a, March 18 khan Kajuru area aṭangin mi 87 vel ruk bo an ni bawk.