Moscow concert hall beihnaa thi 137 tling tawh, mitthite sunna hun hman a ni

Russia sorkar chuan Pathianni khan Russia-in kum 20 chhunga beihna a tawh rapthlak ber, Moscow khaw dai Crocus concert hall-a ISIS firfiakte'n concert chhima kalte an beihnaa thite sunna hun an hmang. ISIS firfiakin Crocus concert hall an beihnaa thi zat hriat hi 137 an tling tawh a, hei hi la pun belh thei niin thuneitute chuan an sawi. Hliam tuar mi 150 an awm bawk.

ISIS firfiak beihnaa thite sunna hun atan hian Russia president, Vladimir Putin chuan Pathianni kha ram pum huap chawlhah a puang a, an ram flag-te chu ni chanve chhung a ngul chanveah pawh thlak an ni bawk. Putin chuan firfiakin an beihnaa nunna chan chhungte a tawrhpui thu leh, ram pumin an tawrhpui thu a sawi. Firfiaka chetna kaihhnawihah hian silai kaptu mi pali man an nih tawh bakah, mi 11 an hreng mek niin Putin chuan a sawi a, pawikhawihnaa inhnamhnawih dangte pawh chhui chhuah vek an tum thu sawiin, hremna pawh pek ngei an nih tur thu a tarlang a ni.