Canada-in Haiti aṭangin an mi leh sate lak chhuah vek tum

Misual rualin an ram rorelna paihthla tura an beih avanga buai mek Haiti-ah boruak muanawm a la awm thei rih lo a, ram rorelna khawl che thei loa misual rualin an siam avangin Canada chuan an mi leh sate awmna atana him lo nia hriain, Haiti aṭang hian lak chhuah vek an tum thu an puang.

Canada foreign minister, Melanie Joly chuan Canada sorkarin Haiti-a an mi leh sa awm, kum upa leh dinhmun hlauhawma dingte la chhuak a, Haiti ram ṭhenawm, Dominican Republic-a sawn an nih theih nan ruahmanna an siam thu a sawi a ni. Joly chuan Dominican Republic hian tun dinhmunah an rama luh chungchangah dan khauh taka an ken kawh thu sawi bawkin, Canada khua leh tui nihna fiah thei passport neite chauh luh an phalsak dawn a ni, a ti. Canada sorkar hian he ruahmanna hmang hian mi 18 an la chhuak tawh a ni. Joly hian sorkarin ruahmanna a siam danah chuan tar/upa lam an la chuak hmasa zel phawt dawn a, Haiti aṭanga Dominican Republic-a sawn tur hian thlawhtheihna an hman thu a sawi tel bawk.

Haiti-ah hian misual rualin March thla tir lam khan an ram khawpui, Port-au-prince-a police station leh sorkar hmun hrang hrang bakah, tan inte an bei a, Prime Minister Ariel Henry chu bang tura an duh thu an sawi a ni. Khawpuia misual rualin buaina an siam avang hian Haiti mi 360,000 chuang chuan mahni in an tlansan tawh niin United Nations chuan a tarlang.