Philippines lawng tibuaituah Chinese coastguard puh

Philippines leh China in thliarkar an inchuh, Spratly Islands bul hnaia chetla, Philippines civilian lawngleng chu Chinese coastguard-te'n water canon hmanga an beih thu Philippines chuan an sawi.

Lawng beih a nih avang hian Philippines chu a lawm lo hle a, lawng chu a chhiat bakah lawnga chuang mi ṭhenkhat chuan hliam an tuar tih a sawi. Philippines foreign ministry chuan an ram chin tuipuia dan ang taka an hmalaknaah China an inrawlh ṭhin chu hriatthiam harsa an tih thu an sawi a, an thuneihna huam chhungah hmalakna nei tawh lo turin China lakah thuchah an siam zui bawk.

China chuan an tuipui chinah chauh coastguard-te chu an chettlat thu sawiin a chhang let ve nghal a, Philippines lawngte chuan China tuipui chin an rawn luh avanga water canon nena hnawt let an nih thu an sawi ve a ni.

South Korea foreign ministry chuan China leh Philippines inkara thil thleng chu an ngai thutak hle tih an sawi a, South China Sea-a boruak ṭha lo zawk chawkchhuak thei a ni tih an sawi. South China Sea-a remna leh muanna a awm a, he tuipui paltlangtute'n ralmuang taka tuipui an paltlang theih nan buaina chu thleng chhunzawm tawh lo se an duh thu an tarlang. SKorea foreign ministry thupuangtu Lim Soo-suk chuan zalen taka tuipui paltlang leh tuipui chung thlawh khum chu international law a nih angin South China Sea bul hnaia ram hrang hrangte chuan heng zalennate hi zah hle se a duh thu a sawi a ni.