Israel beihna avangin Syria-ah mi 40 an thi

Syria defence ministry chuan an ram khawpui pakhat, Aleppo chu Israel-in thlawhtheihna hmangin Zirtawpni zing lam khan a beih thu an puang. Israel-in van lam aṭanga a beih vang hian Syrian 40 chuangin nunna an chan nia tarlan a ni a, thi zinga a tam zawk hi helpawl Hezbollah mi leh sa nia tarlan a ni.

Israel-in a beihnaah hian Hezbollah-te ralthuam dahṭhatna hmun pakhat chu tihchhiat a ni. Syrian Observatory for Human Rights (SOHR) chuan Israel-in a vawi khat beiha Syrian nunna a lak tam ber ṭum a nih thu sawiin, mi 40 thi bakah hian hliam tuar tam tak an awm nia tarlan a ni. Syria defence ministry chuan civil mi leh Syrian sipaite chu nunna chan zingah an tel thu an tarlang ve bawk. Defence ministry lam hian thlawhtheihna bakah drone pawh Aleppo beih nan hian hman a nih thu an sawi bawk.

Israel-Hamas indona a chhuah hnu khan Hamas sangawi zawnpui, Hezbollah hian Israel chu Lebanon chhim lam aṭangin a kap ve ṭan nghal a, rocket leh puak thei thil dang hmangin Israel ram hi kapin, Israel sipaite pawhin an bei let ve reng bawk a ni.

Gaza-ah chhawmdawlna luh tir turin Israel hriattir

United Nations-a dan rorelna in sang ber, International Court of Justice (ICJ) chuan Ningani khan thupek tichhuakin, Israel chu Gaza-a chhawmdawlna tam zawk a luh theih nan hma la turin a hriattir. ICJ chuan Gaza mipuite hian ei leh in tur an tlachham tak zet a, ṭam a tlak mai loh nan Israel chu Gaza luhka tam zawk hawng tura a hriattir a ni.

Nikum October 7 hnua Israel-in Hamas beihna an chhan letnaah insuatna rapthlak tak a thleng tia South Africa-in thubuai a theh luh chungchang ICJ hian a ngaihtuahnaah, Gaza-a chhawmdawlna tam zawk thawn luh a nih theih nan Israel tan thupek hi a chhuah a ni. ICJ chuan Israel chu muangchang loa hma la nghal turin a hriattir a, hemi kawngah hian UN nen ṭha taka thawk dun turin Israel chu a chah bawk.

ICJ chuan chhawmdawlna dal lo tura thuchhuah a siam bakah Israel chu Palestinian mipuiten dikna chanvo an neih chu palzut lo turin a hriattir bawk. Palestinian-te chu 'Convention on the Prevention and Punishment of the Crime of Genocide, 1948' danin a huam ve avangin an chungah rawng taka che lo turin Israel chu a chah a, chhawmdawlna an mamawh angte pawh phurh luh phalsak an ngai a ni, a ti. ICJ hian a thupek tihchhuah chungchanga hma an lak dan chu thla khat hnuah hriattir leh turin Israel chu thu a pe bawk a ni.