Laos-ah Anthrax natna vei an pun vangin Thailand inralring

Thailand ram ṭhenawm, Laos-in an ramah mi 50 chuangin Anthrax natna an vei thar tih an hmuhchhuah thu an tarlan hnuah Thailand chuan an ramchhunga ran vulhtute chu an rante dinhmun leh anmahni dinhmun vil uluk hle turin thuchhuah a siam.

Anthrax hi leia awm bacteria putdarh niin mihring ran vulh bakah ramsa chuan he natna hi an kai thei a, hemi bakah hian mihring pawhin he natna hi kai theiin a zualkai chinah chuan thihna hial pawh a thlen thei a ni.

Thailand Prime Minister Srettha Thavisin chuan thuneitute chu Anthrax natna kai an awm leh awm loh uluk taka vil tura a hriattir bakah mipuite himna chu ngai pawimawh turin thuneitute chu a chah a ni.

Thailand sorkar thupuangtu Chai Watcharong chuan mipuite chu Anthrax natna vei nia rinhlelh an nei a nih chuan thuneitute hnenah rang taka hriattir turin a chah a ni. Ran vulh damlo enkawl mek an awm a nih chuan anmahni bakah an rante chu doctor panpui vat turin an hriattir bawk. Thailand-ah hian kum 2001 hnulamah Anthrax natna vei hmuhchhuah an la awm lo.

Anthrax natna hi mihringin a natna vei ransa an khawihna lamah an pem chhunga bacteria a luhin an kai thei a ni. Heng bakah hian he nana thlentu natna hrik hi thawk laiin hip luh theih a nih bakah ei turah te pawh a lo awm tel thei a, heng avang hian Anthrax natna hi mihringin a vei thei a ni.