China-in Australian wine laka chhiah sang tak lak a titawp

Australia aṭanga wine lak luh tur laka China sorkarin chhiah sang tak a khawn ṭhin chu ram pahnih inkar a ṭha zel tih lantir nan tihtawp a ni dawn niin China chuan Ningani khan puang.

He thu China-in a puan hnu lawk hian Australia lam pawhin World Trade Organization-a China laka thubuai an thehluh chu an hnuh kir tur thu an puang ve bawk.

Australia hian Chinese company Huawei chu Australia ramchhunga 5G pechhuak thei lo tura a hrek bakah, Covid-19 darh chhan chhui chian a ngiat avangin China nen an inkar hi a ṭha lo hle. China chuan Australia chetdan chhan let nan hian Australia aṭanga thil thawn chhuah pawimawh tak tak - wine, barley leh bawngsa-ahte chhiah sang tak takin kum 2020 aṭang khan a lo la tawh a ni. Kum 2022-a Australia rama sorkar inthlak chuan China nena an inkara remna awm theih nan hma a la ta a ni. Australia aṭanga wine thawnchhuaha chhiah lak ṭhin tihtawp a nih hma hian lungalhthei, timber leh barley-a chhiah sang tak lak ṭhinte chu tihtawp a lo nih tawh bawk a ni.

Chinese Commerce Ministry chuan sumdawnna chet vel dan thlirin Australian wine laka chhiah an lak ṭhin chu lak chhunzawm zel a ngaihna an hre tawh lo niin an tarlang a, Zirtawpni aṭangin tih tawp a nih tur thu a sawi. China hian Astralian wine lakah chhiah pahnih; anti-dumping duties (a man zat tura ngaih aia hniam taka sumdawng bungrua ram dang atanga rawn lut laka chhiah sang tak an khawn ṭhin) bakah anti-subsidy duties (sumdawng bungrua laka sorkarin hamṭhatna an pek ṭhinin awmzia a neih loh nan thawn luh a nihna ramah chhiah sang taka lak) te a la ṭhin a ni.