Israel sipaite'n Shifa Hospital-ah râlthuam hmuh belh leh

Israel Defence Force (IDF) leh Shin Bet (Israel Security Agency) te chuan Gaza Strip-a Hamas firfiak pawl hmun hrang hrangte an beih chhunzawm zel. Beihpui an thlaknaah Shifa Hospital chhungah ralthuam thuhruk eng emaw zat an hmuh belh leh tih IDF chuan an sawi.

Gaza Strip hmar lam, Rimal-a beihpui an thlaknaah Hamas-te chuan anti-tank rocket kap chhuakin, sniper rifle nen sipaite hian an lo bei a, mahse, IDF lam hian thlawhtheihna hmangin rocket an kah chhuahna hmun leh, sniper-ho awmna hi an kap let ve nghal a ni. Inrinnia beihpui an thlaknaah hian firfiak 15 chuang an that a ni.

Israel sipaite hian Gaza Strip-a target 80 chuang an kap fuh tawh a, heng zingah hian Hamas military compound pawh a tel tih an sawi. He compound an beih lai hian a chhungah firfiak eng emaw zat an awm niin an tarlang.

US-in Israel hnena bomb leh F-35 thawn remti

United States (US) chuan Israel-in Rafah-ah beihpui a thlak tum chungchang ṭha a tih loh thu langsar taka a sawi hnuah, tun hnaiah Israel hnenah bomb 2,000 chuang leh F-35 fighter jet 25 thawn a remti. Heng ralthuam a thawn turte hi USD tluklehdingawn tel hu a ni.

Pentagon leh State Department official-te chuan Israel hnena an thawn turte hi MK-84 2,000-pound bomb 1,800, MK-82 500-pound bomb 500 bakah fighter jet 25 a ni tih sawiin, hengte hi kum 2008-a Congress-in a lo pawm tawh zinga mi a ni tih an sawi.

US hian, Israel sipaite puihna tur hian kum tin USD tld 3.8 hu a pe ṭhin. Tun ṭuma Israel-in Gaza-a Hamas firfiakte a beihnaah pawh hian ralthuam eng emaw zat a lo pe tawh bawk a, hei hi Democrats leh Arab American group lam chuan an sawisel nasa hle. President Joe Biden kaihhruai sorkar chu Israel sipaite a puihna titawp turtein an phut a ni.