Lebanon-a bomb puakah UN observer-te'n hliam an tuar

United Nations peace­keeping mission-in an tarlan danin, Lebanon chhim lama UN military observer pathum an tirh leh Lebanon mi ṭawng lettu pakhat chuan bomb puak avangin hliam an tuar.

UN observer pathumte hi UN Truce Supervision Organization (UNTSO)-a thawkte an ni a, Lebanon chhim lam, Israel nena an inrina, Rmeish khuaa indona dinhmun zir chiang tur leh inremna kawng zawng tura kal an ni a, Rmeish khuaa an awm lai hian an chettlatna bulhnai maia bomb a puah avang hian hliam an tuar ta a ni.

UN observer leh ṭawng lettuin hliam an tawrh thu hi NIFIL thupuangtu, Andrea Tenenti chuan sawi langin, hliam tuarte hi inenkawl tura hruai chhuah an nih tawh thu leh, dinhmun hlauhawma ding an awm loh thu a sawi. Observer pathumte hi Norwegian, Australian leh Chilean mite an nih thu a sawi lang bawk. UNTSO chuan UN observer-te beih an ni hi an dem thu leh pawmzam mai mai theih a nih loh thu an sawi zui a, UN mi leh sate himna chu ngaih pawimawh a ṭul thu leh, ṭul lo taka inbeih fo chu nunna tam tak derthawnga dahna a nih avanga tihtawp thuai a ṭul thu an sawi lang bawk.

Heng lai hmunah hian Israel sipai leh Lebanon-a helpawl, Hezbollah te chu an inkap fo a, Hezbollah hian nikum October thlaa Israel leh Hamas indona avanga Hamas an thlawpna lantir nan Israel hi an bei ve a ni. Report ṭhenkhatah Rmeish khuaa UN observer-te beitu hi Israel ni anga tarlan a awm a, hei erawh Israel hian phain, Israel sipaite'n helai khua an beih loh thu an sawi thung a ni.