Pakistan PM-in official event-a red carpet hman khap

Pakistan prime minister Shehbaz Sharif chuan official event-a red carpet hman a khap. Red carpet chu diplomatic reception-ah chauh hman tur a ni tiin, he ruahmanna hi inrenchemna kawng khat atana a tih a ni.

Prime Minister chuan minister leh sorkar official ṭhenkhatte'n function an hmannaa red carpet lo phah ṭhin chu thil ṭul lo leh zahthlak tak a ni tiin, ram dang palaite tan chauh hman a ni tawh tur a ni, a ti. Minister leh sorkar official-te hun hmannaa a hautak zawnga thil kalpui ṭhin tihtawp avang hian sorkar chuan sum eng emaw zat a hum thei dawn nia ngaih a ni.

PM Sharif hian leiba ngah avanga harsatna an tawh mek avangin, inrenchemna kalpui chu a kaihhruai sorkarin a ngaih pawimawh ber tur a nih thu a lo sawi tawh a ni. Kar liam ta khan PM leh cabinet member-te chuan an hlawh lak loh an rel a, hemi hma hian President Asif Ali Zardari chuan hlawh a lo la duh tawh lo bawk.

Sharif hi March thla tir lam khan Pakistan Prime Minister thar atan hian lak luh a ni. An ram hian leiba an ngah avangin sum lamah harsatna nasa tak an tawk mek a, an leiba neih mek laka khaichhuah leh, an sum dinhmun siam ṭhatna tura hmalakna atan sorkar chuan International Monetary Fund chu 'programme' dang siamsak tura biak leh a tum.