Israel mipuite'n Netanyahu duh lohna an lantir

Israel leh Hamas-in Gaza-a indona an ṭan hnua Israel prime minister Benjamin Netanyahu duh loh lantirna nasa ber chu Pathianni khan a thleng. He hunah hian Israel mi sang chuang chu Jerusalem-a Israel Parliament kawtah pung khawmin, Netanyahu chu Hamas hren mek Israel mite chhuah an nih theihna daltuah an puh a, mitangte chhuah an nih theih nan Hamas nen inremna siam thuai an duh thu an sawi.

Nikum October aṭanga ṭan, Israel-Hamas indona thleng mek hian Israel mipuite ngaihdan a tiphir hle a, tam takin Hamas inremna siampui an duh laiin Israel mi tam zawk chuan indo chhunzawm an la duh thung. Hamas inremna siampui duhtute zingah hian Hamas hren mek Israel mi 250 lamhnai an tam hle a, him dam taka an chhungte hmuh let an duh avangin Hamas inremna siampui hi ṭul an ti a ni.

Prime minister Benjamin Netanyahu chuan Hamas nuai chimih vek a, tangte him taka hruai haw tiam mah se, a thil sawi tihhlawhtlin hi thil harsa takah mi tam takin an ngai a ni. Mi tang chhungte lam chuan Hamas mi hren mekte chhan chhuah an nih theih nana hun ṭha chu a liam zel niin an ngai.

Parliament kawta pung khawmte hian a luhka an dang hneh hle a, sorkar chuan inthlanna thar huaihawt se an duh thu an sawi. Israel mi pung khawmte hian ni tam tak chhung lungawi lohna lantirin pun khawm chhunzawm an tum niin an sawi bawk.

Israel sipaite'n Shifa Hospital an chhuahsan

Israel sipaite chuan tunhnaia beihpui an thlakna, Gaza City-a Al Shifa Hospital chu nimin khan an chhuahsan ta.

Al Shifa Hospital leh a chhehvelah hian Hamas firfiakte leh an ralthuam thuhrukte dapin Israel sipaite hian kar hnih chhung beihpui an thlak a ni. Hospital chhung aṭang hian ralthuam leh intelligence document pawh ṭhahnem tak an man tih an sawi. Hetih lai hian Hamas leh medical staff-te chuan he hospital hi Hamas hian ralthuam thuhrukna leh, an mi leh sate tawmna atan an hmang lo niin an sawi ve thung.

Hamas health ministry chuan Israel sipaite an chhuah hnuah hospital-ah hian ruang eng emaw zat hmuh a ni tih an tarlang. Mahse Israel chuan Al Shifa hospital-a Hamas firfiakte an dapnaah hian, civil mite, damlo leh medical team lamin an tawrh lohna turin an che niin an sawi a ni. Hospital leh a chhehvela beihpui an thlak chhung hian Hamas firfiak 200 vel an that tih an sawi bawk.