Bulgaria leh Romania te'n European Schengen an zawm
Europe-a ram hrang hrangte'n Europe ram dangte nena intlawhpawhna chungchanga inremna an neih; tuipui, boruak leh khawmual aṭanga awlsam leh zalen zawka inkal pawh theihna, European Schengen chu Bulgaria leh Romania te chuan an zawm ve ta.
Bulgaria leh Romania ramte hian European Schengen zawm tur hian kum 13 zet an nghak a, hei hi Austria-in ram pahnihte hian raltlan lak luh chungchanga hma an la ṭha tawk loa ngaia schengen an zawmna tur a dan vang a ni. Ram pahnihte hi European ram hrang hrang hruaitute nen nikum khan schengen zawm tura inremna hi an ziak a, hei hi March 31, 2024 aṭang khan hman ṭan a ni. Tun dinhmunah Bulgaria leh Romania te'n European schengen an zawm dan hian tuipui leh boruaka inkal pawhna chauh a la huam a, khawmuala inkal pawhna erawh a la tel lo.
European schengen area an tih inremna zawm ramte chuan he inremna zawmtu Europe khawmualpui veka ram dang an luh emaw, an chhuahsan dawn pawhin, tuipuia inkal pawhna, boruaka inkal pawhna leh, khawmual paltlanga inkal pawhna pawh ni se, check an ngai tawh lo a ni. Bulgaria leh Romania-in European schengen an zawm tak avang hian he inremnaah hian ram 29 an awm ta a, heng ram 29 aṭanga ram 25-te hi European Union-a tel ram 27 zinga mite an ni.