Germany-in cannabis hman phalna dan siam

Germany chuan cannabis (ganja) hman phalna leh thlah zalen deuhna tur dan siamin, he dan hi nimin aṭang khan hman ṭan nghal a nih thu an puang.

Cannabis chung­changa dan siam ṭhatah hian Germany chuan kum 18 chung lam tan, puipunna hmunah cannabis gram 25 aia tam lo kawl chu phal a ni tawh dawn a, puitlingin ama inah cannabis kung thum a khawi thei dawn bawk a ni.

Hetih lai hian sikul leh infiamna hmun ang chi aṭanga lang thei hmunah, zing dar 7 aṭanga zan dar 8 chhungin cannabis zuk hi khap a ni thung a, vantlang puipuinna hmunah zuk phal a ni lo bawk. Dan siam ṭhat zingah hian July 1 aṭanga hman ṭan tur a awm dawn bawk a, cannabis chingtu pawl, member 500 chin awmna din phal a ni dawn a, mahse, member-te chu Germany-a cheng, kum 18 chung lam an nih a ngai thung a ni. Heng pawlte hian cannabis hi an ching thei anga, hlep neia zuar loa an sem chhuah erawh phal a ni anga, a hmuna an zuk erawh phal a ni dawn lo a ni.

Cannabis chung­changa dan siam ṭhat hi police-te chuan an duh loh thu tarlangin, khawvel pum nghawng thei thil niin an sawi. German police union GdP, Alexander Piotz chuan cannabis thlah zalen chuan a zawrhna market a tihlen sawt a rin thu a sawi bawk. Police union bakah hian Standing Committee of European Doctors (CPME) te chuan cannabis-in mihring rilru ngaihtuahna a nghawng theih dan ngaihtuahin, thlah zalen chu thil ṭha nia an hriat loh thu an sawi bawk a ni. Hetih lai hian he dan thlawptu, cannabis zu tam tak chuan khapna a awm reng chung pawha cannabis zu an tam thu leh, lei tur hmuh a harsat loh thu te, black market-a to tak taka lei ai chuan dan thar hmang hian cannabis quality pawh a ṭhat phah theih an rin thu an sawi ve thung a ni.