Toshakhana case-a Imran Khan-te nupa hremna titawp

Pakistan-a Islamabad High Court chuan Toshakhana corruption case-a prime minister hlui Imran Khan leh a nupui, Bushra Bibi-te kum 15 jail tang tura hremna a pek tawh chu Thawhṭanni khan a titawp rih.

Kumin January 31 khan state gift an dawnte dan kalha kawl leh tirala puhna kaihhnawihah Imran Khan-te nupa hi accountability court chuan kum 14 ve ve jail tang turin hrem a lo tichhuak tawh a ni. He hremna hi Islamabad High Court-ah an khing let a, IHC chief justice Aamer Farooq kaihhruai member pahnih awmna bench chuan a ngaihtuah a ni.

High Court chuan Khan-te nupa hremna hi a tihtawpsak rih a, bail an dilna pawh a phalsak bawk. Mahse hremna pek ngaihtuah ṭha leh tura an ngenna hi thla thara Eid festival zawh hnuah ngaihtuah a ni dawn tih court chuan a sawi bawk. Court-in Toshakhana case-ah bail-a chhuah phalsak mah se, Khan hi a thubuai dangah thiam loh chantir a ni tho avangin jail aṭanga chhuahtir a nih erawh a rinawm lo a, a nupui Bushra pawh hi thubuai dangah thiam loh chantir a lo ni tawh bawk.

Toshakhana corruption case-ah hian kum 71 mi, Khan hi Pakistan Prime Minister a nih laia ramchhung leh ram dang aṭanga thilpek hlu tak tak a dawnte a mimal tana kawl zuia puh a ni. Toshakhana dan hnuaiah chuan sorkar official-te chuan thilpek an dawnte chu a man hu pein an kawl zui thei a, mahse, hemi hma hian an thilpek dawn hi sorkarah an theh luh hmasak phawt a ngai ṭhin. Khan leh a nupui hian an thil pek dawnte hi an theh luh loh bakah, an thuneihna hmangin a man hu pawh ni lo, tlawm tea khula an puh bawk.

Imran Khan hi Toshakhana case-a thiam loh chantir a nih bakah, sorkar thuruk tiput rua puhna, cipher case-ah thiam loh chantirin kum 10 tang tura hrem a lo ni tawh bawk. Hei bakah hian nikum August thla khan Toshakhana case dangah thiam loh chantir a ni bawk a ni.