Israel-in Gaza a beihnaa thi zingah NGO worker 7 an tel

Israel sipaite'n Thawhṭannia central Gaza-a airstrike an neihnaa thi zingah food aid NGO, World Central Kitchen (WCK)-a thawk mi pasarih an thi a, an zingah hian Australia, Britain leh Poland mi an tel.

Celebrity chief Jose Andres-a NGO din, World Central Kitchen tana thawktu mi pasarihte chu armoured car pahnihin Gaza-ah hian an lut a, thawktu zingah hian Palestinian-te bakah United States leh Canada dual citizen pawh an tel. Tuipui aṭangin ei tur hi ton 100 chuang an phur lut a, an thil phurte an dah hnuah, Deir al-Balah warehouse an chhuahsan dawnin an convoy hi kah fuh a ni ta a ni.

WCK chief executive, Erin Gore chuan he thil hi WCK beihna ringawt a ni lo a, chhawmdawl hna thawktute beihna a ni, a ti. He thil thleng hi ngaihdam theih a ni lo, tiin a sawi .

Israel sipaite chuan hetianga beihna a thlenna chhan hi uluk takin an ennawn leh dawn tih an sawi a, "Israel Defence Force chuan chhawmdawlnate hi him taka sem chhuah a nih theihna turin theihtawp a chhuah a, WCK nen pawh Gaza mipuite hnena chhawmdawlna leh ei turte pek an nihna turah hian ṭha takin an thawk dun a ni," a ti.