Pakistan-a thi Chinese ruang panga an ram luhpui a ni
Pakistan-a helpawlin an beihnaa thi, China mi pangate ruang chu Thawhṭanni khan China ramah luhpui an ni.
China leh Pakistan-in inkalpawhna ṭha zawk an neih theih nana project an thawh dun mek, China-Pakistan Economic Corridor (CPEC) avangin Chinese hnathawktu tam tak chu Pakistan-ah hian hnathawkin an awm mek a ni. Heng hnathawktu zinga mite hi Pakistan-a inkhuar helpawl chuan an bei ṭhin a, nunna chân pawh an awm nual tawh.
Kar liam ta khan Khyber Pakhtunkhwa province-ah Chinese mi panga leh an driver Pakistan mi chu helpawlin thihchilh bomb hmanga an beih avangin nunna an chân. Beih tawkte hi CPEC peng pakhat hnuaia Dasu project-a hnathawk mekte an ni. Nunna chânte ruang hi Thawhṭanni khan sipai thlawhtheihna hmangin China panpui an ni a, an ram khawpui pakhat Wuhan thlenpui an ni. China chuan an mi leh sate thihna chhui chiang tur hian Pakistan-ah hnuchhui thiam an tir lut tawh niin an sawi.
China Foreign Ministry thupuangtu, Wang Wenbin chuan ruang pangain China a thlen tawh thu sawiin Pakistan chu thil thleng chhui chian kawngah an thlawp zel dawn a, pawi khawihtute chuan an phu tawk hremna hmu ngei se an duh thu a sawi. Pakistan Prime Minister Shehbaz Sharif pawhin rang taka hnuchhui hna ṭan tur leh an hnuchhui kawngah hmaih nei lo turin hnuchhuitute chu a hriattir tawh bawk.