Taiwan-ah magnitude 7.2-a nain lir a nghing

Taiwan-ah nimin zing khan magnitude 7.2-a nain lir a nghing a, lirnghingin chhiatna a thlenah mi pakua an thi a, hliam mi 700 chuang an awm. In chimin a delh mi eng emaw zat an la awm avangin thi zat pawh hi an la pun chhoh rin a ni.

Nimina lirnghing hi kum 25 chhunga Taiwan-a lirnghing nat ber ṭum a ni. Lirnghing vang hian Japan chhim lam leh Philippines-ah chuan tsunami warning tihchhuah a ni a, a hnuah an sût leh a ni.

Taiwan sorkar chuan mitthi palite hi lirnghing inṭanna bul, Hualien khawchhak lama chengte an ni tih sawiin, he bialah hian hliam tuar 711 an awm thu a tarlang. Hualien-a in chimah mi 77 an tang a, chhanchhuah hna thawh mek a ni bawk.

President elect Lai Ching chuan nimin tlai lam khan Hualien khua hi a tlawh nghal a ni.

Magnitude 7.2-a naa lir a nghing hnuah hian aftershock ṭum 50 chuang a thleng bawk niin Taiwan central weather administration chuan a sawi.

Taiwan central news agency chuan nimin lirnghing hi kum 1999-a magnitude 7.6-a naa lir nghing vanga mi 2,400 vel thihna thlen hnua an rama lir a nghing nat ber ṭum a ni tih a sawi. 1999-a lirnghing avang hian building 50,000 vel a chhia a ni.