Concert-na hmun beih vangin sipaia ṭan duh an pung : Russia

Russia defence ministry chuan kar liam ta Thawhṭannia an ram khawpui, Moscow-a concert hall beih a nih hnuah an ram ṭhalai, sipai ṭan duha inpe an pung nasa hle niin a sawi.

Thuchhuah an siamah, defence ministry chuan kumin kum tir aṭangin armed forces zawm tum, contract sign hi mi nuai khat chuang an awm tawh a, kar liam ta khan mi 16,000 zet an awm belh bawk niin an tarlang.

Ministry chuan, "Kar liam taa khawpui hrang hranga selection point-a interview neihah, candidate tam zawk chuan March 22, 2024-a Moscow khawpuia pawikhawihna rapthlak tak thlentute chunga phuba lak an duh avanga sipai zawm duh an nih thute an sawi a ni," a ti.

Crocus City Hall beihnaah khan mi 144 an thi a, he pawikhawihna hi Islamic State firfiak pawl chuan an tih niin an chhal. Hetih lai hian Russia chuan pawikhawihtute hi Ukraine nena inzawmna nei niin a sawi thung a, mahse, hei hi Ukraine chuan a pha a, US pawhin Russia thusawi hi a pawm lo tih a sawi bawk.

President Vladimir Putin chuan kum 2022, September thla khan sipai nuai thum lak belhna tur hi a duang a, mahse, voluntary contract-a sipaia lut hi an pun chhoh nasat tak avangin compulsory anga sipai lak tharna kalpui chu a ngai kher dawn ta lo niin an sawi.