Netanyahu-a'n tum reng vanga aid worker-te that an ni lo tih a sawi

Israel sipaite'n Gaza City-a airstrike an neihnaa ṭanpui hna thawktu pawl, World Central Kitchen-a thawktu pasarih thihna thleng chungchangah, Israel prime minister Benjamin Netanyahu chuan tum reng vanga that an ni lo tih a sawi.

Benjamin Netanyahu chuan, " Vanduaithlak takin, kan sipaite chuan tum reng vang ni loin tihpalh thilin Gaza Strip-ah pawisawi lote an kap fuh tel a ni," a ti. Hemi rual hian indonaah chuan heng hi a thleng fo tih a sawi a, thil thlen dan chu a tawp thlengin uluk taka an chhui zui tur thu a sawi bawk. 'Sorkar dangte pawh kan be pawp a, hetiang tihsual palh hi a thlen tawh lohna turin kan theihtawpin hma kan la dawn a ni," a ti.

Thawktu pasarihte thihna thleng avang hian World Central Kitchen chuan Gaza-a ṭanpui hna an thawh pawh an titawp rih. Israel airstrike avanga thi ta, aid worker-te ram hruaitu hrang hrangte chuan he thil thleng hi an dem thu sawiin, thil thlen dan chu chhui chiang a, insawi fiah tura Israel an phut thu an sawi.

Israel sorkarin Al-Jazeera channel khap dawn

Israel Parliament, Knesset chuan Israel sorkar hnena TV channel tihchhuah khapna tura thuneihna pekna dan a pawm. Israel hian Qatar sorkar hnuaia mi, Al-Jazeera channel block a tum a ni.

Prime minister Benjamin Netanyahu chuan an rama Al Jazeera local office khartir turin hma a la nghal dawn tih a sawi. 'Israel aṭangin Al Jazeera tihchhuah a ni tawh lo ang,' tiin, terrorist channel tiin a sawi.

Israel-Hamas indona thleng mekah, Gaza Strip-a foreign journalist-te luh khap a ni a, he hmuna awm Al-Jazeera chu indona chanchin cover thei leh, report petu berte a ni.

Knesset-in a pawm tak bill-ah hian an ram himna tiderthawng thei nia ngaih, foreign network-te 'temporary'-a khapsak turin sorkar chu thuneihna a pe a ni. He dan hnuaia khapna thupek hian ni 45 chhung a huam a, hman nawn leh theih reng a ni bawk ang. He dan hi kumin July thla thleng emaw, Gaza indonain ziaawm lam a pan hma emaw hman a ni dawn a ni.