Palestinian-te hian statehood hi UN-ah ni lo Inbiakna hmanga an ngaihtuah a ngai : US
United States (US) chuan Palestinian-te'n an puala ram hran din an duh chungchang chu United Nations-ah ni loin, a kaihhnawih pawl hrang hrangte nena hmaichhana inbiakna hmanga an ngaihtuah a ngai zawk a ni, a ti.
Palestinian Authority chuan kum 2011-a UN-a full member dilna a theh luh tawh chu ngaihtuah ṭha leh turin a ngen thar leh a ni. Kum 2012 khan UN hian on-member observer state status a lo pe tawh a, mahse, tunah hian full member a dilna chu ngaihtuah nawn leh turin a ngen leh a ni.
UN full member ni tur hian United Nations Security Council (UNSC) member ram 15-te pawmpui a ngai a, hemi hnuah hian member 193 awmna, General Assembly-a member hmun thuma ṭhena hmun hnihin an pawm a ngai bawk. UNSC-ah hian US chuan veto a nei a, hei hi Palestinian thil phut chungchangah hian an hmang dawn em tih zawhna chu State Department thupuangtu, Matthew Miller chuan a sawi chiang duh lo. Hemi rual hian Palestinian ram din chungchang chu UN-ah ni loin, a kaihhnawih party hrang hrangte nena inbiakna hmanga ngaihtuak zawk tur a ni tih a sawi.
UNSC-ah hian April thla atan Malta chuan president dinhmun a chelh mek a, UN-a Malta ambassador Vanessa Frazier chuan Palestinian ngenna siam hi council member-te hnenah an pe kual tawh tih sawiin, an ngenna kalpui dan tur hi member tinte an sawipui dawn tih a tarlang.
Spain-in Palestinian ram pawm a tum
Palestinian Authority-in UN-a full membership an dilna ngaihtuah ṭha leh tura an ngen mek karah, Spain prime minister Pedro Sanchez chuan Middle East tour a neihnaah, Palestinian ram hran nihna chu an ram chuan July thlaah a pawm dawn niin a sawi.
PM Sanchez hi Jordan, Qatar leh Saudi Arabia ram tlawh turin a zin mek a, Jordan ram tlawh hmasa berin, an ram khawpui Amman-a chanchinthar lakhawmtute a kawmnaah he thu hi a sawi niin Spanish media-te chuan a tarlang. Sanchez chuan March 22-a European Council meeting neihah, an ram bakah Malta, Slovenia leh Ireland-te chuan Palestinian-te'n Israel-in a awp chhung, West Bank leh Gaza Strip-a Palestinian ram an puanna chu pawm a, hma la hmasa bertu nih an lo remtih tawh thu a sawi. Israel chuan hei hi na taka chhang let nghalin, heng ram palite thiltih hi firfiakte lawmman siamsakna a ni tiin, Gaza Strip-a buaina chingfel tura hmalakna pawh tichhe theiah a puh.