Botswana President-in sai 20,000 thawnah Germany a vau

Botswana President, Mokgweetsi Masisi, chuan Germany-in an rama ramsa kah lawmman (hunting trophy) thawn luh chungchanga dan khauh zawk an siam avangin Germany-a sai 20,000 thawn luhah a vau.

Germany hian ramsa kah nasat lutuk tur ven nan leh nungchate an mang mai loh nan, an rama ramsa kah lawmman (ramsa taksa peng eng emaw dah ṭhat tur an hawn ṭhin) thawn luh ṭhin chu tihtlem a, khauh zawka dan kalpui tur an ruahman a ni. He dan hi Green party mi, Steffi Lemke, environment ministry-a mi put luh niin, "Khawvel huapa ramsate dinhmun derthawng zelah, keimahni lam aṭanga kan tih ve theih, ramsa kah lawmman lo thunun hi kan duh a ni," a ti.

Germany-in dan thar an siam chungchangah hian Masisi chuan an ramin sai tam lutuk avanga harsatna an tawh thu leh, sai an pung nasa lutuk chu hri chhia ang mai a nih thu sawiin, Germany mipuite chu sai bula khawsak zir ve chhin se a duh thu a sawi a ni. "Botswana-ah hian sai kah hi sai pung nasa lutuk tur ven nan a ngai a, a nih loh chuan min chimral mai a hlauhawm a ni. Berlin-a awm chunga Botswana chungchanga ngaihdan lo neih hi thil har a ni lo a, mahse, khawvelin nungchate humhalh a duh avang hian keini'n kan tuar thung a ni. Min hrilh ang hian ramsate nen hian chenho han tum ve chhin zawk teh u" tiin, sai rualin an in leh huan an tihchhiat dan te, ramsa kahna lawmman thawn luh ṭhin tihtlem chuan an harsatna a belh chhah tur thu te a sawi lang a ni.

Bostwana-ah hian sai 1,30,000 chuang awm meka hriat a ni a, Germany-ah hian sai 20,000 thawn luh mai an duh thu hi an sawi. Angola hnenah Sai 8,000 pek lo tum tawhin, Mozambique hnenah pawh sai 500 pek a lo tum tawh bawk.